Mat 16 | DOB | STEP | 'Ebweu tuta 'enaya 'aidi Palisiyao be Sadusiyao simai ga Yesu sienaidena, sabi toona, ga sieonena, “Kapekapeyana be we'iwe'iyaya 'ebweu 'uda guinuwe be 'ada 'awa'ai'aile 'aene 'imu waiwai Yaubada 'enega 'imai?”

Matthew 16

We'iwe'iyaya manudi

(Madiu 12:38-41; Maki 8:11-13; Luke 12:54-56)

1 'Ebweu tuta 'enaya 'aidi Palisiyao be Sadusiyao simai ga Yesu sienaidena, sabi toona, ga sieonena, “Kapekapeyana be we'iwe'iyaya 'ebweu 'uda guinuwe be 'ada 'awa'ai'aile 'aene 'imu waiwai Yaubada 'enega 'imai?”

2 Ga Yesu 'iona, “'Omi 'abo sinala wa'ita 'isugusuguwa be galewa 'ebwaga 'enega 'ibweyalina, ni'atu wamwalatonina 'aene 'iabe mali 'asiyata 'enaya 'oelaa bobo'ana. 3 Ta 'abo gonagonaya galewa bweyabweyalina ta gaigaina wa'itai, nate wasinapu 'aene kwau 'imeema. Ga nate ona'ai'aila we'iwe'iyaya nidi 'oelaa manudi 'adi mwalatoi ni'atu wamwalamwalatonidi, ta esi we'iwe'iyaya gete tuta nidi manudi nigeya wamwalamwalatonidi. 4 'Epata gete 'omi to'umalimi ta sogala 'alemi, nate 'alena we'iwe'iyaya wa'ebe'ebese be 'aene 'ediyega wada mwalatoi 'ai'ailigu 'aene Yaubada 'enega yamai, ta geya'abo sa'i we'iwe'iyaya nidi wa'ita'ita. Nate namo Yona manuna wanuwa'i'isi, tauna tuga we'iwe'iyaya manumi.” 'Enega Yesu 'ipilisinedi ga 'itauya.

Palisiyao be Sadusiyao 'idi 'ebe gieseseya beledi manuna

(Maki 8:14-21)

5 'Enega mali esenaya siabala, ta 'ina tonono nidi 'adi 'abwaga nigeya si'ewa'ewadi, manuna sinuwa pupuledi. 6 Ga nada Yesu 'ieonedi, “Palisiyao be Sadusiyao 'adi beledi 'ana 'ebe gieseseya 'enega wa'ita'i'isimi.”

7 'Enega tonono nidi taudimo 'ediya sigwae, “Nai Yesu 'ina ona 'alena getei manuna 'ada 'abwaga tanuwa pupulena.”

8 Ta Yesu 'idi nuwanuwa ni'atu 'imwalatonina, 'enega 'ieonedi, “To'ase manuna waonaona 'aene nigeya 'ami 'abwagamo? Nate nigeya manuna yaonaona. Nigeya waemiemisa 'ai'aila, aga? 9 Nigeya sana wanuwa sabwalena tuta nina beledi nima 'ediyega tomota paibi tausani yae'enidiya, ta masula 'ana tupwa maibo'ana waegogonedi, 10 ga 'enega kodo yaudi waloemaedi? Tomota wate powa tausani beledi sebeni 'ediyega yae'enidiya ta 'ana tupwa maibo'ana waegogonedi ga kodo yauna 'ediyega waloemaedi? 11 'Enega to'ase manuna ga nigeya wanuwanuwa sabwalena 'aene nigeya masula manuna yaonaona? Ta esi Palisiyao be Sadusiyao 'idi 'ebe gieseseya 'enega wa'ita'i'isimi.”

12 Gote 'ena nuwadi 'isabwalena 'aene nigeya beledi 'ai'aila 'ana 'ebe gieseseya manuna 'ionaona, ta esi Palisiyao be Sadusiyao 'idi e'itao 'ediyega sida 'ita'i'isidi.

Pita 'ina simana Yesu manuna

(Maki 8:27-30; Luke 9:18-21)

13 'Enega Yesu 'imai Sisalia Pilipai senanaya ga 'ienaida 'ina tononoyao 'ediya, 'igwae, “Mwa'adega tomota 'idi ona 'abo'agu Tomota Natuna manugu, 'aene 'abo'agu yaita?”

14 'Enega sigwae, “'Aina tomota siona 'aene 'oyo Yoni togiebapitaiso, ta 'aina tomota siona 'aene 'oyo Ilaitiya, ta 'aina siona 'aene 'oyo Yelemaiya nai gimipalopita 'ebweu tuga.”

15 Ga Yesu 'ienaidedi, 'igwae, “Ta 'omi mwa'adega 'imi nuwanuwa 'aene 'abo'agu yaita?”

16 'Enega Saimoni Pita 'ilolagata ga 'igwae, “'Oyo To'etoseyana Yaubada mayawasina natuna.”

17 Ta Yesu Pita 'ieonena, 'igwae, “Saimoni, Yona natuna, 'oyo ona'ai'aila togwausowala 'ebweu, manuna 'imu mwalatoi gete nigeya tomota 'ediyega, ta esi Tamagu galewaya 'ina mwalatoiyega 'i'ebwa'emu. 18 Ta wate yaeonayo 'aene 'amu esana Pita, ta 'oyo gulewa, be 'emuya 'igu ekalesiya yada 'abi, be 'enega geya'abo bubuna to'umalina 'iewaiwai 'igu ekalesiya nina 'ena. 19 Ta wate 'ebeloina galewaya 'ana 'ebe gigege ya'ebwa'eyo, be to'ase bale'uya 'ugibode, galewaya wate sigibode, ta wate 'abo to'ase bale'uya 'ugigege, galewaya wate sigigege.”

20 Gote 'ena Yesu 'ina tononoyao 'iloina pa'aledi, 'igwae, “Geya'abo 'ebweu yaita 'ena wasimasimanegu 'aene 'abo'agu To'etoseyana nina.” Ko 3:11; Gu 4:10-12; Ep 2:20v19 Yo 20:23

Yesu 'ina mwawasa ma'etamo manuna 'igimisimana

(Maki 8:31-9:1; Luke 9:22-27)

21 Tuta gote 'enaya Yesu 'ie'ale ga 'ina tononoyao 'ie'itedi, 'igwae, “'Ilobwenena be yatatauya Yelusalema be nada 'elouya yaudi yada lobadi, 'inapwanao be totaliyao sinabwadi be loina 'ana toe'itao 'ediyega, be gote 'ena siloemwawasigu, ta 'asiyata 'etonina 'enaya Yaubada 'ida gietoolo limagu.”

22 'Enega Pita Yesu ma'alenaya 'itauyena, ga 'i'enapa'alina, 'igwae, “'Inapwana, yage gete geya'abo 'emuya 'iapweapwesa!”

23 Ta Yesu 'iasakowasi ga 'iona Pita 'enaya, 'igwae, “'Oyo Seitani, gete tuga 'upilisinegu! Geya'abo 'u'eto'etobodegu! 'Imu nuwanuwa tomota 'idi nuwanuwa, ta nigeya Yaubada 'ina nuwanuwa nadigega.”

24 Muliyega Yesu 'ina tononoyao 'ieonedi, 'igwae, “Yaita 'eguma nuwanuwana be 'imuliyegu, 'ilobwenena be tauna 'ina nuwanuwa 'ida guitoyase, be tauna 'ana kelose 'i'aali, be 'enega 'imwamwawasa, nate nadigega 'agu muliya nina 'ana 'eda.

25 “Ta 'eguma yaita yawasina 'iegagale, ma'etamo yawasi nina 'iloseye. Ta 'eguma yaita yawasina manugu 'itagwale be 'imwamwawasa, tauna 'iabe yawasina bobo'ana 'iloba.

26 “'Eguma 'ida esaesao bale'uya sinabwa wawasae talobadi, nate yage besobeso, ta esi yage sinabwana nate yawasida bobo'ana. Manuna 'eguma yawasida bobo'ana taloseyedi, nigeya 'ebweu wate 'ana lopa'elu 'imiyami.

27 “Ma'etamo 'abo'agu Tomota Natuna yaila limanama, be Tamagu 'ina esaesa tuyatuyayalina 'enega yailama, ta wate aniloseyao ma'egwao, be tomota 'idi guinuwao 'adi e'isa ya'ebwa'edi.

28 “Yaona 'ai'aila 'emiya 'aene tomota 'aimi geya'abo wamwawamwawasa 'ana laba 'abo'agu, Tomota Natuna, yailama sabi loina be 'ena wa'ita limagu.”